Derje, derje
je na zemi,
lubosć dawać,
lubosć brać
ze spěwom
a radosćemi młode lěta wěncować přetož rjana kćeje meja,
ale wostać njemóže,
róže spadnu,
lěta dżeja,
praja spěšnje božemje."

...





























































































Jan Bulank



Wón narodźi so pod łužiskimi horami we Wotrowje 07. 09. 1931. Hudźbnje nadarjeny hižo jako šulski hólčec wosadnych na pišćelach přewodźeše. Gymnazialne wukubłanje absolwowaše w Kamjencu a w Budyšinje. Maturitu złoži na Budyskej serbskej wyšej šuli. Wón studowaše w Lipsku na wysokej šuli za hudźbu "Felix Mendelssohn-Bartholdy" 1952 - 1955 kompoziciju a 1955 - 1958 chórowe a ansamblowe wuměłstwo na wysokej šuli "Franz Liszt" we Weimarje pola profesora Fredricha, hdźež nasrěba sej lubosć k spěwej a chórowej hudźbje.

Hižo za čas studijow poča komponować a napisa za młody lud rjad woblubowanych pěsni kaž wusahowacy serbski evergreen "Wjesele dźensa". Z nim zbudźi powójnski młodźinski elan k wozrodźenju serbskeho narodneho žiwjenja. Dostudowawši skutkowaše w rozhłosu za hudźbne wusywanja. W profesionalnym serbskim narodnym ansamblu přewza zamołwitosć jako wyši wuměłski nawoda a chórowy dirigent. Za jeho wusahowace dźěło spožči so jemu čestny titul HD (hudźbny direktor).

Z Bulankoweho pozbudźowaceho kompozitoriskeho pjera smy brali krasne chórowe twórby a wobdźěłanja a tež mnohe rady spěwane składby kaž "Domčk mój ródny" a "Chwalu sej domiznu". Wjacore kantaty a cykliske twórby kaž "Struga" (komorny oratorij) jeho swojotny hudźbny rukopis zwuraznjeja. Přewšo bohaty je skład baletneje hudźby, kotruž za rejwarske sceny ansambla napisa. Tež za film a telewiziju spisa wjacore hudźbne podłohi. Jedna z poslednich jeho twórbow je přerjana "Serbska misa".

Jako chórowy nawoda a dirigent je znaty a wustojny interpret wurjadnych twórbow a chórowych sinfonijow mištrow serbskeje hudźby kaž Bjarnata Krawcoweje "Missy solemnis" a Korle Awgusta Kocorowych swětnych oratorijow. Za nje napisa wón tež orchestrowe sadźby. Tačele z tutymi interpretacijemi wostanu z jich trajnymi swědkami.

Wulke zasłužby zdoby sej z wudaćemi edicijow serbskeje hudźby a spěwnikow. Wjacore wuměłske myta jeho hudźbno-tworićelske dźěło česća.

Jan Bulank załoži 1964 serbski ludowy chór "Budyšin" a wubědźi sej z nim 1972 na International Musical Eisteddfod w Llangollen w Jendźelskej 4. městno mjez swětowej wubranku, 32 chórami ze wšěch kontinentow. Wot lěta 1985 pěstujetaj chóraj "Pevecky zbor Stěbořice" a "Budyšin" wzajomne přećelske poćahi. Dirigentaj Karel Kostera a Jan Bulank staj z toho časa najwutrobnišej a njerozdwójnaj přećelej.

Jan Bulank sta so jako hudźbnik a komponist, chórowy nawoda a dirigent kaž tež wudawaćel spěwnikow z hudźbnej wosobinu, kotraž słuša do rjadu wurjadnych serbskich hudźbnikow. Bohužel bě nam wón přezahe, w januaru 2002 na prawdu Božu wotešoł.



Jan Handrik w meji 2003


"wróćo"